پاکستانی کھلاڑی ٹی ٹوئنٹی کے بعد ون ڈے اور ٹیسٹ ٹیموں میں بھی، انڈین کھلاڑیوں کی عدم موجودگی

اسلام آباد (ملتان ٹی وی ایچ ڈی آن لائن)

سال 2021 پاکستان کرکٹ ٹیم کے لیے بہترین سال رہا ہے، خواہ ٹی ٹوئنٹی ہو، ون ڈے یا ٹیسٹ فارمیٹ آئی سی سی کی سال کی بہترین ٹیمیں پاکستانی کھلاڑیوں کے بغیر پوری ہوتی دکھائی نہیں دے رہیں۔

پاکستانی کرکٹ ٹیم کے کپتان بابر اعظم آئی سی سی کی سال کی بہترین ٹی ٹوئنٹی ٹیم کے کپتان کے بعد اب ون ڈے ٹیم کے کپتان بھی ہوں گے جبکہ آئی سی سی کی سال کی بہترین ٹیسٹ ٹیم کے لیے پاکستان کے تین کھلاڑیوں کو نامزد کیا گیا ہے۔

جمعرات کے روز آئی سی سی کی جانب سے ون ڈے کرکٹ کی سال کی بہترین ٹیم کا اعلان کیا گیا جس میں نہ تو کوئی آسٹریلوی یا انگلش کھلاڑی شامل ہے اور نہ ہی کوئی انڈین کھلاڑی اس ٹیم میں جگہ بنا سکا ہے۔ پاکستانی اوپنر فخر زمان بھی اس ون ڈے ٹیم میں جگہ بنانے میں کامیاب ہوئے ہیں۔

دوسری جانب خواتین کی سال کی بہترین ٹیم میں 20 سالہ پاکستانی بولر فاطمہ ثنا کو بھی شامل کیا گیا ہے۔ فاطمہ ثنا نے سنہ 2021 میں 24 کی اوسط سے 20 وکٹیں حاصل کیں، جس میں ایک فائیو فار شامل تھا۔

آئی سی سی کی جانب سے ٹیسٹ کی بہترین ٹیم کا اعلان بھی کیا گیا ہے جس میں پاکستان کے تین کھلاڑی فواد عالم، حسن علی اور شاہین شاہ آفریدی شامل ہیں۔

فواد عالم، جنھوں نے سنہ 2020 میں 11 برس بعد ٹیسٹ ٹیم میں اپنی جگہ بنائی تھی، نے سنہ 2021 میں 57 کی اوسط سے 571 رنز بنائے جس میں تین سنچریاں شامل تھیں۔ دوسری جانب پاکستان کے دو فاسٹ بولرز شاہین آفریدی اور حسن علی نے بھی بہترین بولنگ کا مظاہرہ کیا ہے۔

سنہ 2021 میں ٹسیٹ میچوں میں شاہین آفریدی نے 17 کی اوسط سے 47 وکٹیں حاصل کیں جبکہ حسن علی نے 16 کی اوسط سے 41 وکٹیں حاصل کی ہیں۔

Leave a Reply

Your email address will not be published. Required fields are marked *